| 日前新聞睇到傑志球員盧志軒踢踢波暈低，三位BA真係嚇到鼻哥窿無肉，心諗唔會咁邪呀，季初西維爾球員佩亞達場內突然猝死事件會唔會不幸降臨香港，好彩最後軒仔都醒番，度祝福軒仔可以早日康復，快出院啦！ 雖然話歐協盃係雞肋，但橫掂去到四強，就梗係想順便入埋決賽捧埋盃。費倫咁樣失諸交臂，球員當然好唔開心。由於歐協盃踢足一百二十分鐘，今晚仲要山長水遠去到卡利亞里，唔輸已經偷笑！ 互射十二碼出局，又係幾唔抵。對於韋利畀人鬧係輸波罪人，我就更替佢不值。射失十二碼有幾奇，就算腳法幾好、狀態幾弗球員都可能宴客喇，唔好彩之嘛。對於大做文章話「Bobo」光輝不再，唔會再踢大賽就更加好笑，佢唔係依家先知「Bobo」年老力衰呀嘛？佢唔係最高水平好耐喇，一個老人家咁努力去踢仲想點，如果佢仲係主力，練都唔會下半場七十八分鐘先搵佢後備入替喇！ 費倫呢排個勢唔多理想，對住主場都幾厲害卡利亞里好難避免失分。不過韋利點都唔會再畀人鬧，因為佢傷唔出得！ 推介：卡利亞里 | 
