| 可能係近年最重要米蘭打，今晚聖西路一觸即發！雙方目前都極需要三分達成各自目標，彼此戰意可謂旗鼓相當，但論近況，AC明顯較優勝，單係恩沙基同卡卡呢對一老一嫩孖寶已經夠殺，何況國米仲要唔齊腳；足智彩初盤AC讓平半已顯出信心，朱楓推介上盤！（now633台及廣東體育周日晚9:00直播） 雖然AC米蘭今季表現令人大失所望，但隨近期表現有所上升，依家只係落後第四位費倫天拿兩分，出線下季歐聯重現曙光，今晚取勝隨時搶番主動權，戰意唔使懷疑。AC近況回勇，功臣首推老將恩沙基，呢位「執雞王」近四場勁入八球，當中上仗作客利禾奴更大演帽子戲法，難怪柏圖都要被貶後備。 此外，卡卡近期亦開始擺脫傷患上番力，前仗對里賈納連中三元就係最佳例證，AC有呢一老一嫩孖寶前線掛帥，就算門將迪達、卡富、馬甸尼、沙真奴、艾馬遜同朗拿度養傷，朱楓認為整體影響不大，更何況AC近年以主場名義對國米佔到極大優勢，最近七次交手就獲得四勝兩和一負佳績。
 國米三線 唔齊腳
同上星期一樣，國米今仗只要贏波，就可藉對賽成績較佳壓倒羅馬提前成功冕，之但係國米今仗陣容仍然不整，射手伊巴謙莫域、中場費高、達葛治、守哥度巴、森美爾同貝迪素悉數倦勤，前線要靠兩個加埋已經六十五歲告魯斯同基斯普衝鋒陷陣，活力完全不足，唔好話尼斯達，隨時對住費華利都冇運行，受讓平半都咪亂試。 | 
