| 今晚英超同英冠兩個戰場，味道截然不同。英超「雙紅」阿仙奴同利物浦，分別鬥愛華頓同曼城，兩支勁旅都無欲無求，將大踢開放足球，大盤要留意；英冠水晶宮同狼隊為爭升班，主場出擊亦一定去盡，主Ｗ要實。 水晶宮狼隊Ｗ得
阿仙奴上仗鬥打比郡，出部分二線兵，好似丹尼遜同賓特拿等都有落場，佢為爭取表現搏到盡，製造好多入波機會，呢場雲格仍會重用佢。愛華頓為爭足協盃資格，亦唔會有保留，呢場必然對攻，大盤好路。而利物浦主場鬥曼城，紅軍於歐聯出局，聯賽亦穩奪第四，球員可以放鬆心情打，而曼城更一早上岸，去到晏菲路又係開大格。英冠去到煞科日，水晶宮同狼隊為趕上「升班附加賽尾班車」，主場出擊目標都係三分，咁有鬥志主Ｗ穩陣到極。 去到四月，無論歐洲足球同ＮＢＡ都去到決勝時刻，只要你鍾意體育，一定興奮萬分。可憐係一眾女伴或太太，睇見身邊人廢寢忘餐，冷落自己，心中必定不是味兒。但大家既然有緣分埋一齊，就唔好抱怨咁多喇，頂多捱多兩、三個月，等歐國盃決賽周過埋就會有好日子過。而男士們有得必有失，你咁開心咁多睇，不如出錢請女伴旅行，到時小別勝新婚，感情話唔定有增無減。 | 
