| 今日繼續有熱身賽上演，土耳其於德國中立場鬥芬蘭，「客W」好路。芬蘭係歐洲三線球隊，呢場後面冇希比亞，前線列馬倫又得番三成功力，難威脅土國。歐國盃舉行在即，土耳其極渴望贏番場以振軍心，再加上德國有好多土國人民，等如有半個主場之利。（周五凌晨2時30分開賽） 土耳其上仗熱身賽二比三不敵烏拉圭，後防明顯出現問題，歐國盃即將開賽，領隊泰廉一定為針對問題加以改善。因為大戰迫在眉睫，土耳其全隊都好搏，前線尼赫治、端基，兩個中場發電機安利同爾迪雷巴斯杜克狀態都唔錯，佢絕對唔想連輸兩場熱身賽，就係呢個爭勝心，就已經值得捧場。 哥倫比亞豈懼愛爾蘭 另一仗愛爾蘭於倫敦鬥哥倫比亞，後者受讓平半值博。愛軍新帥查帕東尼上仗處子督師，決心改變高Q大腳踢法，改踢地波推進，效果麻麻。哥軍實力不俗，面對轉型中愛爾蘭，可力保不敗。 | 
