今晚冰島主場迎戰威爾斯，論實力兩隊波都係有限公司，不過，今場冰島缺少王牌箭頭古莊臣，戰鬥力大打折扣，相反威爾斯隊長比拿美久休復出，大軍士氣大振，唔打得都嚇得，作客一樣有力贏波。（周四凌晨3時35分開賽）
冰島主力缺陣 要數冰島當家球星真係冇乜，最大名氣一定係古莊臣，雖然呢位射手今季巴塞隆拿長坐冷板，但仍然係國家隊王牌箭頭，可惜今場佢冇份踢，睇球隊想入波都幾難。與此同時，樸茨茅夫守將靴達臣亦有傷唔踢得，大軍攻守主力缺陣，絕對信唔過。
威爾斯隊長比拿美休戰七個月後傷愈歸隊，頭陶錫話佢抖好耐，唔會用到盡，但呢個精神領袖應該會落場第五十頂帽，大軍士氣實好好多。雖然今仗有中場西蒙戴維斯因傷缺陣，但隊中仲有古馬斯同占士哥連斯等英超兵撐住，照秤贏到冰島。
