| 文迪有份評述英格蘭輸畀克羅地亞場波，睇到英軍前線同後防表現的確令人失望，睇住自己國家隊出局，小弟相信最唔開心應該係成晚齋睇朗尼同里奧費迪南。今晚曼聯作客保頓，一於捧佢大勝番場，開個「讓球客勝」幫兩位失望英格蘭人沖沖喜！（now632台周六晚11:00直播） 曼聯陣中班英格蘭國腳全部都冇輸畀克羅地亞場波上陣，但落場輸波，總好過坐場邊睇住自己隊波輸，幫唔到手種感覺都幾難受。眼見前線頻頻失機，後防頻頻犯錯，除一班英格蘭Fans同庸帥麥卡倫之外，主宰前線同後防朗尼同里奧費迪南應該都係最無奈個。 近6次作客對賽未輸過
今晚朗尼仲未踢得，但未必唔係一件好事，以佢大情大性性格，英格蘭出局，佢表現一定會有所影響，雖然泰維斯拍沙夏破壞力點都唔及拍住朗尼咁堅，但加埋Fit爆C朗，對住保頓條弱雞防線都夠殺有餘。加上曼聯近六次作客保頓都未輸過，仲次次有波入，今場閒閒入兩三球都唔奇。 保頓今季大跌Watt，依家排尾三，明顯就係畀歐協盃所累，雖然佢作客逼和拜仁，打出今季代表作，但叻一次就唔代表叻一世，佢聯賽平均一場都入唔到一球，雖然射手安歷卡可以復出，但對住有里奧費迪南同雲達沙指揮防線，想入波都幾難，英軍班後係時候偷師，學班前輩點防守喇。卡臣？算吧啦！ | 
