| 巴塞隆拿上輪聯賽意外輸畀基達菲之後，引發唔少危機，隊長佩奧爾發火鬧隊友，練列卡特亦帥位動搖，好彩有個國際賽檔期隔一隔；今晚西甲重開，巴塞主場出戰排尾三維爾瓦，贏波係基本任務，若嫌主W賠率乏味，可捧入球大。（有線足球台61周日凌晨3時直播） 巴塞暫時排第三，亨利加盟後攻力更強，但總係踢唔出霸氣，不過細鬼對於佢上場聯賽不敵基達菲唔會太介懷，因為上屆西班牙盃都唔夠基達菲砌，今次再輸明顯係「格食格」，同實力無關。 不過巴塞表現不穩係事實，亦引發好多問題，隊長佩奧爾向來快人快語，佢不點名批評隊中有「敗家仔」，佢所斥責對象不出兩人，唔係鬧細哨就係亨利，鬧邊個都好，佩奧爾都係想鬧番醒隊波，減少犯錯。 愛將力保列卡特飯碗
成績一般，練列卡特亦有一定壓力，有傳媒估計列卡特今季再交唔出成績，勢必被炒，球壇就係咁現實，阿頭有難，擁護列卡特巴塞球員就要打醒十二分精神，踢番幾場好波，以壓抑批評聲音。 細鬼唔擔心維爾瓦會爆冷，佢近兩場聯賽同盃賽都以一球小勝對手，近況有好轉，但之前表現實在太差，由九月底至十一月初連續十個鐘頭未入過波，上輪聯賽小勝奧沙辛拿，細鬼翻查賽事報告，該仗佢贏在夠運，奧沙辛拿頻頻埋門，點知門將蘇蘭天奴突然「上身」救晒出，之後再由卡路士馬田斯入波奠勝。 如果維爾瓦一直咁輸，佢今場作客魯營球場肯定打守勢波，未必會大敗，但近期二連勝之後球員心雄，同巴塞鬥攻話，分分鐘大敗，所以今場買大係最正路。 | 
