| 「見高就拜，見低就踩」，呢個係社會同球壇共同風氣，紐卡素同利物浦依家就親身印證！紐卡素近三仗只得一分，有消息話肥叔叔艾拿戴斯即將被炒，射手奧雲又再打柴，搞到球隊人心惶惶。相反賓尼迪斯連贏兩仗後，連拜仁慕尼黑都話想撬佢過檔，最重要係費蘭度托利斯復出，「紅軍」當堂復活，今場作客肯定踩多紐卡素兩腳，客W信得過！（now632台周六晚8:45直播） 紐卡素近排認真濕滯，對上三場聯賽只係弱旅新特蘭身上搶走一分，球會對於艾拿戴斯非常唔妥，最近已經搵人接棒，據聞夏利列納係主要目標，不過艾拿戴斯心腹維度卡、戴安尼菲爾同祖爾巴頓等球員就唔多開心，內部士氣好有問題。其實我一向欣賞艾拿戴斯保頓成就，可惜佢粗線條打法搬去紐卡素唔多用，冇成績係意料中事。
名家搵食攻略
 大把傷兵艾拿戴斯危危乎
點解咁講？艾拿戴斯戰術圍繞體力同硬朗打法，但係紐卡素陣中唔係技術型就係玻璃腳，今仗就有杜夫、巴巴耶路、卡爾、卡卡巴、拉美治、戴安尼菲爾受傷，最慘係奧雲國家隊又整傷。紐卡素近三仗除靠人擺烏龍外，就只係得占士米拿入過波，冇埋奧雲仔都唔知點算？ 利物浦早排畀人踩一輪，但炒完比錫達斯八比○後，上仗再贏富咸二比○，成個氣勢即刻扭轉，最近聽聞拜仁想搵賓尼迪斯過檔，不過賓帥已經拒絕，個情況同紐卡素完全相反。而且主隊奧雲仔受傷，利物浦就有費蘭度托利斯復出，呢位西班牙國腳上周冇踢到國際賽，難得好好休息同養傷，今場出番肯定搵紐卡素開殺戒！
| 
