| 要數今季德甲最令人失望球隊，肯定非紐倫堡莫屬，主場勝率唔夠兩成，依家仲要傷兵成籮，雖然練美耶賽前獲球會力撐，可惜佢近八次主場對多蒙特從未贏過；多蒙特勝在有國腳基爾復出，有力保持不敗！（有線62周一凌晨0:00直播） 紐倫堡近年企穩德甲中游位置，上季更取得第六名兼贏得德國盃取得歐協盃資格，可惜今季明顯兼顧唔到雙線發展，打十三場聯賽先贏得兩場，主場勝率更唔夠兩成，搞到要護級漩渦掙扎，失二十四球更排德甲第二高，情況令人慘不忍睹。 近8次對多蒙特未贏過
紐倫堡體育經理巴達賽前企出力撐練美耶帥位安全，相信美耶可以帶領球隊走出谷底，不期然令朱楓諗起熱刺未炒祖爾前亦講過同一番說話。可能紐倫堡球員好支持美耶，今晚會打爭氣波，但老實講句，美耶今場手頭上多達九名傷兵，當中仲包括維迪、賓路拿同積及臣等主力，根本冇本錢贏波反彈，最慘佢近八次主場對多蒙特僅取五和三負未威過，格食格到咁，讓平半都撐唔落！ 多蒙特今季同樣備受傷兵困擾，主力前鋒阿歷山大費爾一傷再傷復出無期，不過佢近八場只係輸過兩場，證明有一定韌力。賽前「蜜蜂兵團」收到好消息，就係防守中場基爾終於復出，中場攔截力大增，對住士氣同實力都差一皮紐倫堡受讓平半，你話下盤係咪穩執半格先？ | 
