| 意甲上輪賽事發生不幸事件而有三場押後，受影響其中兩隊國際米蘭同阿特蘭大今晚交手，阿特蘭大球迷由於過分激進，今晚被禁入場打氣，阿特蘭大孤軍作客，肯定頂唔住國際米蘭主場強攻，今場主Ｗ穩陣，度士博埋「讓球主勝」。（now 633周日凌晨３時30分直播） 阿特蘭大雖然只係中型班，但佢班球迷好激進，鍾意四圍惹火頭，唯一友好球會只有丙組塔拿納，但係仇家就一大籮，最大仇口係鄰近球會布雷西亞，同佢有牙齒印球隊計有維羅納、熱拿亞、費倫天拿、羅馬、拉素、拿玻里、ＡＣ米蘭、拖連奴，當然仲有國際米蘭，阿特蘭大球迷打氣都會揮舞藍黑大旗，同「藍黑兵團」國米撞晒色，搞到雙方球迷經常有衝突。 球迷被禁入聖西路
上輪阿特蘭大主場對ＡＣ米蘭因球迷搞事踢唔成，為懲罰滋事球迷，索性禁止客軍球迷進入聖西路球場，令國米主場優勢更明顯，佢聯賽連歐聯主場已經六連勝，今場再贏機會甚高。 人腳方面，國米有狀態托弗伊巴謙莫域夥拍告魯斯，中場甘比亞素同後捷禾為國家隊服役後歸隊，今仗可披甲，中堅馬特拉斯已傷愈可候命，國米下周中歐聯又係主場出擊，對手係費倫巴治，今仗勢必全力求勝增強信心。 至於阿特蘭大除冇擁躉打氣，射手森柏拿繼續缺陣，哥斯天拿、達拉蒙迪、梅斯連莫域仍養傷，迪艾辛迪斯停賽，輸波係意料中事，捧「讓球主勝」好合理。
| 
