| 聽朝南美自由盃十六強首回合，冕冠軍小保加主場對高士路，記住捧主勝！事關小保加係「自由盃專家」，大賽經驗足，最緊要係上場聯賽刻意收起列基美等四名主將，擺明留力今戰；對家高士路射手馬些路摩蘭奴受轉會傳聞困擾，隨時影響發揮，鋒線信唔過作客聽炒！（開賽時間：周四凌晨4:10） 阿根廷勁旅小保加近年似足利物浦，本土成績平平，但去到同歐聯同級自由盃就踢到曉飛，最近八屆自由盃四度掄元，堪稱自由盃之鬼！雖然佢今屆分組賽遇到阻滯，要最後一輪先靠得失球反壓高路高路奇晉級，但實情同佢上屆捧盃之路有幾分相似，足證小保加踢淘汰賽特別醒神。 更何況小保加為今戰，上場聯賽對住爭標勁敵聖羅倫素，都夠膽死收起右閘艾維路干沙利斯、中場列基美、巴達基亞、達圖路四名主力。賽前已知呢四位大將聽朝會復出，再配合彭拿莫同柏拉斯奧呢兩名超班前鋒，火力非同小可。
 高士路小組作客不勝
 兩屆自由盃盟主高士路今屆雖以A組首名出線，但佢今屆分組賽作客居然未贏過！三戰只得兩和一負，更何況分組賽幫高士路射入八球，暫時射手榜領先玻利維亞新星馬些路摩蘭奴近日備受皇馬同利物浦兩大班霸注視，隨時掛住諗轉會影響發揮，睇怕高士路今場作客都係凶多吉少。 | 
