| 二○一○世界盃亞洲區外圍賽戰火重燃，今日下晝有線足球台就有直播，暫時第一組以一勝一和四分暫列榜首澳洲，將會主場擺擂台迎戰伊拉克。由於伊拉克同澳洲實力始終有一段距離，加上作客出戰，近期士氣亦存疑，睇都好難有爆冷空間，今仗可以進取少少，博澳洲贏夠兩球，開「讓球主勝」。（有線61周日下午3:00直播）
雙方舊年亞洲盃時已經交過手，不過當時澳洲先加入亞洲足協，而且賽事又安排泰國舉行，球員明顯適應唔到東亞地區悶熱天氣，搞到水準大跌，結果以一比三輸畀伊拉克。今次世界盃外圍賽，一來重要性高過亞洲盃，二來澳洲有主場之利，加上唔少球員都有外流歐洲搵食經驗，只要能夠踢出正常水準，應該可以成功復仇。 伊拉克面臨禁賽損士氣 伊拉克球壇近期最大新聞，係有可能被國際足協禁賽一年，士氣點都受到影響，國際足協未有最終裁決之前，要班球員集中專注力備戰，實在唔容易。再講，伊拉克上年雖然贏亞洲盃，好可惜近期戰績就麻麻，作客三連敗之餘，仲要輸畀泰國同卡塔爾兩隊亞洲弱旅，今次出征袋鼠國，一句講晒：以卵擊石！ | 
