| 近期好多國際熱身賽舉行，不過部分球隊練兵為主，爭勝心成疑，難得呢兩日有多場世界盃亞洲區外圍賽上演，Peter寧吼呢類打真軍賽事，今日第1組賽事澳洲主場對伊拉克，呢組屬死亡之組，每場勝負對出線都甚關鍵，澳洲主場表現一向有保證，力足小勝伊拉克，「1:0」波膽及入球「細」皆可捧。
聽晚Peter將負責評述第4組賽事新加坡主場對烏茲別克，新加坡近期主場表現唔錯，受讓下本應值得捧場，但客軍實力較強，勝負好視乎臨場派乜球員上陣，所以宜抱觀望態度，反而另一場第2組賽事巴林作客對泰國仲好路，巴林六連勝如日方中，泰國分組賽兩戰俱敗敬陪末席，平手盤可放心捧巴林。 NBA夢幻對決睇積遜 今屆NBA總決賽由兩支傳統勁旅波士頓塞爾特人及洛杉磯湖人競逐，Peter睇NBA四十五年，呢兩支球隊可以講係NBA史上擂台躉，由當年「小鳥」布特鬥「魔術手」莊遜，直至今時今日再於總決賽相遇，每次碰頭都極具叫座力，可以預期今屆決賽精彩程度及電視收視上都有十足保證。兩隊陣中猛將如雲，加納特、皮雅斯、高比拜仁、賈蘇，個個獨當一面，由於決賽採取「二三二」七場四勝制，塞爾特人雖然種子排名較高，但並冇實際優勢，勝負將取決於各員主力未來兩星期內會否有所受傷，或者狀態上突然走樣，相信戰況一定十分接近，但如果在兩軍練角度上比較，湖人隊練積遜身經百戰，或者在調兵遣將上會有些微佔優，亦是湖人隊稍為優勝之處 | 
