| 周中英格蘭砌低美國二比○，今晚遇上中、北美洲二線球隊千里達，理論上更加實食冇黐牙。不過，安高稍嫌佢領隊卡比路太過托大，卡帥話體諒有份踢歐聯決賽曼聯同車路士國腳都好辛苦，所以就一口氣畀朗尼、夏格維斯、布朗、艾殊利高爾、林柏特、泰利同祖高爾提早放假。 主人家百周年派對搏命 由於里奧費迪南有親戚千里達，可以順便探親，以及布歷治冇份踢歐聯，兩人則會繼續隨隊，合共二十人大軍，將會搭超過二十小時飛機去千里達踢呢場波。人腳削弱兼搭長途機，冇一瓣有數，仲點踢好波先？
除此之外，今場話晒係畀面派對，去幫人慶祝百周年盛典，唔通會想大炒人一場贈興咩？至於話英格蘭足總一直想千里達足總代表會對佢申辦二○一八世界盃投支持票，安高真係對英軍鬥志有多少懷疑。 約基回歸千里達踢告別賽 千里達呢邊，領隊麥杜蘭拿話明會趁呢個機會磨練陣中年輕球員去為世盃外圍賽做準備。睇番千里達大軍名單，前鋒約翰、堅韋尼鍾斯同卡路士艾華斯等都係英格蘭搵食球員，質素唔算太曳，更何況今仗佢仲會有老將約基回歸客串一場當踢告別賽，隊友梗會落力，以免「大師兄」丟架！ | 
