| 瑞典上場熱身賽憑老將軒歷拿臣優異演出，主場一球小勝斯洛文尼亞，球隊上下狀態一流，今晚再於主場迎戰陪練心態烏克蘭，1.65倍主W值得支持。（now 633周日晚10時直播）
瑞典領隊拿格碧克今次重召老將軒歷拿臣出戰決賽周，證明係明智決定，上場熱身賽對斯洛文尼亞軒歷拿臣雖然下半場入替，但落場後成功製造多次埋門機會，令瑞典整體進攻更具威脅，而且一班邊緣正選好似韋希姆臣、施巴斯坦拿臣上場亦踢出高水平，表現大獲好評，相信可為球隊造成良性競爭，上場休息伊巴謙莫域、卡斯唐等為保正選席位，有機會上陣亦唔可以流攤，鬥心絕對唔使懷疑。 烏克蘭戰意成疑 烏克蘭一眾主力如舒夫真高、禾路連、泰摩斯卓克雖然有入選，但球季完結，球員難免心散，上場對另一支決賽周隊伍荷蘭慘吞三蛋已證明一切，今晚作客實不宜高估，目前主W有1.65倍非常抵玩。 泰林點兵話之你「土皇帝」 歐洲國家盃十六路大軍名單已經正式公布，一線球隊法國猛人多到揀都揀唔晒，查斯古特已經不在話下，法米尼同賓艾化兩位今夏轉會市場焦點人物，一樣要陪球迷齊齊睇波。 瑞典名氣行先唔實際 至於二、三線勢力，由於人腳有限，點兵惟有以名氣行先，只要個朵夠響，國家隊大門永遠為佢打開，就以瑞典為例，明知龍格保傷勢唔輕，伊沙克臣坐足成季冷板，仍然被徵召入伍之餘，仲要係必然正選，前景認真唔樂觀。
不過唔係所有二線兵都要打地莊，講緊就係○二年世界盃季軍土耳其，五月初初選名單當中，老將哈根蘇古已經被領隊泰林率先被放棄，到最後二十三人名單，再有爾迪雷巴斯杜克同哈利艾天托普兩位名將，因今季德甲演出平平而被飛，就認真估佢唔到。
換上一個比較保守領隊，「土皇帝」哈根蘇古呢類經驗豐富球員，肯定會被率先留用，至於二十五歲史浩克射手哈利艾天托普，更加會係必然正選，領隊泰林以狀態為重，先後剔走以上兩位有名氣箭頭，成效係點仲有待驗證，但絕對係膽識過人，筆者等住睇佢決賽周調兵遣將功夫 | 
