| 今晚西甲有十場賽事，重頭戲落薩拉戈薩對皇家馬德里身上，雖然皇馬已經冇好爭，但球員個個都狀態大勇，就算出副選都夠贏。再者，魯爾和雲尼斯達萊等老將仍要為趕搭國家隊尾班車而努力，今場相信唔會流攤。皇馬罕有地受讓，下盤睇落幾抵捧。（有線足球台61周一凌晨3時直播） 現時薩拉戈薩已陷入水深火熱，聯賽僅領先尾三奧沙辛拿一分，稍有差池都要降班，所以今場莊家亦將薩軍微調整到要讓波，因為佢認為皇馬只係打例行公事。表面上，皇馬的確冇爭，但細鬼仔細地諗，同樣諗唔到皇馬點解要放水畀薩拉戈薩，因為對自己根本冇好處，如果贏波逼到其實有一定實力薩拉戈薩降班話，來季少支攔路虎，對自己都有好處。 薩拉戈薩態沉有心無力
細鬼認為如今已經冇球隊阻得到皇馬，皇馬近五仗全勝，洛賓、魯爾及史奈達等攻擊球員狀態大勇，從上場大炒巴塞隆拿可見一斑，薩拉戈薩有心都未必頂得住。而有留意薩拉戈薩朋友，應該明白佢未達到最佳狀態，尤其迪亞高米列圖有傷在身，今場又有迪奧高缺陣，陣容不整下點讓到波。 雖然皇馬已經到聯賽錦標，但球員就唔多受國家隊歡迎，好似魯爾及古迪等都只屬邊緣分子，所以餘下兩仗都要盡力爭取表現爭上歐國盃尾班車，唔怕佢會流攤。 | 
