聽朝巴西盃上演八強次回合賽事，由聖卡坦奴中立場對哥連泰斯。聖卡坦奴為收復首回合失地，必定主攻；考慮哥連泰斯有前冇後，一於捧「入球大」！（開賽時間：周三早上7:30）
首回合聖卡坦奴作客輸畀哥連泰斯一比二，兼有守將高安奴領紅今場要停賽，形勢睇落好似好不利，但其實巴西球隊一向唔使作客都打高兩皮，以巴西盃上圈為例，首回合作客輸波或和波球隊，次回合返主場或中立場居然獲六勝一和一負，當中仲有七場開大，比率接近九成。
雖然哥連泰斯今季降落乙組，但組軍方面卻非常積極，包括買入上季巴甲次席射手阿哥斯達及借入前阿根廷小國腳靴里拉，當中以後者最為標青，近兩場勁入四球，不過弊就弊在後防亦失三球咁多，呢種有前冇後踢法，對住焗攻聖卡坦奴，好難唔開「入球大」！
