| 去到季尾意大利波成為博彩公司眼中釘，部分莊家斬腳趾避沙蟲，直情唔開盤，好似今晚卡利亞里作客烏甸尼斯，大戶露搏殺手影，為減低風險，唔少莊家索性開少場。今日肥叔心水係奧沙辛拿，主場對住梅西亞讓到一球、球半，飛數極具信心，主勝穩陣！ 奧沙辛拿現時排緊尾三，形勢非常危急，今周對住降班梅西亞，絕對係搶分良機，如果今場都贏唔到，睇怕可以疊埋心水踢西乙。目前主W企硬1.4倍上下，讓到一球、球半，足見好多人睇好佢贏得，主W夠穩，上盤亦捧得過。 英超今晚煞科，布力般流浪作客伯明翰，伯明翰要讓平半，初盤一早有大戶重錘買落下盤度，明顯對客隊好有信心，甚具出擊味道。伯明翰季尾愈踢愈沉，絕對讓唔起布力般，下盤諗得過。另外，富咸關鍵時刻開始發力，今晚作客樸茨茅夫，對手周末要踢足總盃決賽，實會留晒力，依家客隊讓半球，飛數勁成咁，值得跟進。
 皇馬受讓放地雷
西甲方面，皇家馬德里已經捧盃，今晚作客薩拉戈薩係例行公事，對手等緊呢三分救命，相信佢唔會阻人發達，堂堂西甲冠軍有得受讓平半，你話點會咁筍，捧主隊啦！ | 
