| 今晚英超煞科戰，最矚目當然係聯賽冠軍誰屬。咪以為煞科戰充滿變數，樂比仔實在諗唔到曼聯有任何失落冠軍理由，因為「紅魔鬼」今季愈戰愈勇，主力球員完全感覺唔到半點疲態，主將基斯坦奴朗拿度近期腳風超順，經過整個星期休息，韋根冇任何爆冷機會。客W1.2倍係送畀廣大球迷禮物，如果嫌少可捧埋入球大。（now 632周日晚10時直播）
 英超對戰紅魔全勝 曼聯目前同車路士同得八十四分，但曼聯有十七個得失球差優勢，故此只要今晚全取三分，冇乜可能唔冠軍。英超對上一次鬥到最後一輪先至分出冠軍，已經要追溯到九九年，當年「紅魔鬼」曼聯勇奪三冠王，今季亦向「雙冠王」進發。論實力，係球迷都知曼聯高幾班，而且兩隊打法仲格食格，自韋根升上英超以來六次對曼聯全敗，失二十球之多，當中包括兩年前聯賽盃決賽，曼聯大勝四比○，可見關鍵時候，曼聯就會見真章。今季C朗已射入四十球，正全力向歐洲金靴獎及丹尼士羅單季入球紀錄進發，今場絕不手軟。 樂比仔嘗試為韋根找出今場有利因素，包括JJB薯仔田草地質素甚差，不利曼聯地面推進發揮、曼聯箭頭朗尼極可能因傷避戰、同埋韋根孖寶路爾斯華倫西亞及柏拉西奧斯季尾大勇，來季極可能轉投曼聯，今場要向費格遜「騷哥利」等等，但以上所謂有利條件，都不足以彌補兩軍之間差距，以及曼聯爭勝決心。 布魯士老費有偈傾
有小道消息話韋根領隊布魯士同費格遜私交甚篤，今場會放水云云，樂比仔一向唔信陰謀論，因為曼聯本身人強馬壯，又何須對手放水？另韋根戰意鬆懈亦係事實，正如熱刺同華倫西亞早前捧盃後，踢聯賽立即跌Watt，又新特蘭護級成功後，上仗對保頓亦無厘神氣。 照此推論，護級成功韋根今場就算踢唔出最佳水準都係人之常情。事實上，韋根正副隊長米茲洛及基爾賓尼今仗都因傷掛上免戰牌，韋根後防一向不穩，冇埋兩名正選閘位球員就更加危危乎。 | 
