| 阿叔落：「射十二碼，一係入，一係就唔入。」但計我話，射十二碼除入同唔入之外，你仲可以做英雄，又可以做狗熊！ 先旨聲明，力奇上周日冇份買國米，不過睇見國米最後階段有馬特拉斯射失十二碼，贏唔到波之餘，仲隨時搞到國米失落聯賽錦標，就真係戥佢球迷同捧場客唔抵。事後馬特拉斯就公開道歉，話其實球會一早有指令，告魯斯先係國米十二碼劊子手，佢自己只係搶射，依家好衰唔衰射唔入，係咪一個道歉就當冇事先？ 國米班主莫拉堤鬧得好，話馬特拉斯可能斷送個意甲錦標畀羅馬；隊友占美尼斯話對唔住球迷，但冇怪罪馬特拉斯，之但係或者佢唔知道，國米前輩○二年就係最後一周只要贏波就捧盃，結果佢輸畀拉素二比四，會唔會歷史重演，真係天先知。 其實，假如今次係由告魯斯射失，大家都會安慰佢，話係壓力大同冇運氣之類，但偏偏馬特拉斯就衰要爭食。講真，唔通你射入一球十二碼，我會讚你好波，係捧盃最大功臣咩？依家你射失連累球隊，仲要衰多樣—違反練指示，隨時成個失落冠軍責任都畀晒佢，你話馬特拉斯仲唔係戇居中戇居咩！ | 
