| 今晚上演英冠附加賽次回合賽事，首戰淨輸兩球「大黃蜂」屈福特為求平反敗局，預期作客都焗住搶攻，之不過侯城主場表現硬淨，打穩守突擊更加係強項，防線唔多靠得住屈福特輸多鋪唔出奇，主隊讓平半必捧上盤，一於撐侯城去溫布萊！（now898台及無收費電視998台周四凌晨2:45直播）
 首回合侯城憑韋達斯同班比兩位老將各建一功，作客二比○擊敗屈福特，晉級機會可謂高唱入雲。其實班比今季因傷同狀態問題，上陣機會一直唔多，領隊菲臘布朗首回合大膽派佢上陣，絕對係應記一功。 屈福特防線不穩
陣中主將依家冇病冇痛，預期菲臘布朗會沿用上仗陣容應戰，加上柏達臣同奧高查都及時傷愈，令侯城後備力量更雄厚。 落後兩球屈福特有烏斯泰斯停賽，好彩射手達路斯軒達臣刑滿復出，領隊保夫萊特肯定會安排佢夥拍艾寧頓攻堅，力圖反客為主扭轉劣勢，可惜佢今季四十六場聯賽失五十六球，係前列分子當中失波最多隊。首回合薛圖同沙特拿犯錯直接令球隊先輸一球，睇得出屈福特條防線根本唔穩陣，對住主場不敗率超過八成侯城仲要焗攻盞送死，擅打突擊侯城有力贏多鋪！ | 
