| 歐洲足協盃終極決賽，今晚於中立場曼城體育場上演。先後淘汰德甲雙雄、近兩圈足協盃入九球辛尼特，將面對防守專家、近兩圈一球不失格拉斯哥流浪，名副其實一場「矛盾」之爭！流浪以一記「守」字訣，先後淘汰士砵亭及費倫天拿等攻強守弱球隊，今晚佢肯定繼續話唔攻就唔攻，「死守」到辛尼特冇晒符！所以投注策略首選要流浪受讓平半下盤，另外入球細、和波都可考慮。（有線足球台61周四凌晨2時45分直播） 記得前輩黃興桂曾經講過「No Defense、No Champ！」冇防守就冇冠軍，嘉輝非常認同，尤其適用於盃賽之中。流浪就係名言中寫照。自從足協盃打入三十二強淘汰賽後，佢就一直守落去，結果八場比賽中流浪於法定時間內只曾贏兩場，但就已經足夠殺入決賽，可見防守幾咁重要。
 守勢波無往不利
 雖然呢種「醜陋」踢法，一直備受外界批評，好似費倫天拿頭柏蘭迪利更怒斥佢違背足球原意。但流浪領隊禾達史密夫一於懶理，今場賽前表明繼續沿用成功「守」法，總之萬大事最緊要唔失波，最多互射十二碼分勝負。 辛尼特射手停賽
睇番流浪對上幾次「守」功，又的確要寫個服字，一條四人防線再搭上巴利費格遜、希丹尼及史提芬戴維斯等破壞型中場，一心死守確係堅韌無比。而今場辛尼特仲要有首席射手、至今足協盃射入十球之多普基尼克停賽，入波難度倍增。 曼城近格拉斯哥
另外，流浪今場亦有額外優勢，就係比賽場地於曼城主場舉行。曼徹斯特市距離格拉斯哥非常近，搭內陸機唔使一個鐘就去到，加上氣候、環境等唔需要重新適應，今晚可算有半個主場優勢。再者，流浪最近有美國國腳比士利久休復出，而蘇格蘭中場麥高洛治亦及時傷愈，陣容變得完整。雖然今場有後備前鋒丹尼卡辛停賽，另外首席門神麥基哥亦未傷愈，但二號門將尼爾阿歷山大上場成為晉級英雄，信心大增，半個主場之下流浪受讓平半，一於要下盤。 | 
