| 澳洲約戰加納進行國際友誼賽，旨在練兵備戰下個月世界盃外圍賽。雖然加納缺少中場悍將艾辛，但澳洲人腳仲差，超過大半隊主將冇入選，今日就算有主場之利都冇優勢，平手盤一於博加納！（開賽時間：周五晚6:00） 澳洲土炮未夠班
「袋鼠兵團」今日傍晚會悉尼足球場恭候加納，由於隊長尼爾個老婆臨盆在即，今戰肯定缺陣，所以同利物浦約滿基維爾將以隊長身份領軍。呢位左翼今季大部分時間用養傷，狀態好極有限。加上卡希爾、艾馬頓、比斯安奴、維度卡等主將都名落孫山，今戰靠晒一班本土搵食球員，整體實力參差。 名帥利萊早排拒絕同加納續約，迪戴亞就以看守領隊身份頂上，為博一紙長約，後者肯定使盡渾身解數帶領球隊贏波。艾辛、艾比亞一對中場冇入選，之但係彭素爾、文沙、蒙達利、阿高高呢班骨幹球員都會披甲，點秤都高過拉雜成軍澳洲，作客都未使驚！ | 
