| ESPN獨家直播歐聯決賽，曼聯同車路士莫斯科決戰！今季雙方一離開自己地頭就踢得好保守，甚至乎過分謹慎，費Sir密集防守，會同格蘭中場壓迫戰術進行大激鬥，個人質素佔優藍軍，門前把握機會能力較強，未嘗冇機會制敵致勝。 藍戰士壓迫踢法煞食
呢支曾經被譏諷為金錢而戰僱傭兵團，但去到季尾車路士忽然團結，呢股力量更刺激到一班球員爭勝欲望，亦加強格蘭指揮信心。事實上，格蘭以往對強隊成績稍差，惹來球評家同球迷詬病，不過戰至英超次循環，車仔主場先後擊敗兵工廠同紅魔鬼，展示出班霸氣勢，尤其係用泰利引領防線向前壓，中場就開始攔截踢法更加一絕，今晚到決賽，就更加會將呢種戰術發揮得淋漓盡致。正所謂「橋」唔怕舊，最緊要「受」，藍戰士利用個人技術把握反擊機會，分分鐘搞到曼聯一頭煙！ 喪攻求生紅魔精神
費爵爺每逢歐聯作客都格外謹慎，用密集防守降低對方效率，睇怕呢場都唔會例外。但係唔敢貿然搶攻，其實反而綁手綁腳。好似早前聯賽對碰，曼聯史丹福橋輸場波，一樣係穩守為主，到末段失守，曼聯最後幾分鐘瘋狂進攻，發揮出真正紅魔鬼精神，但到歐聯決賽重要時刻，要劣勢下反撲並唔容易，所以費爵爺同格蘭每行一步棋都要諗清諗楚，無論如何，都希望雙方能夠豁出去，呈獻一場精彩激戰！ | 
