| 歐聯終極決賽今晚於俄羅斯莫斯科上演，如果今場比賽安排於其他中立場舉行，Peter毫無疑問會支持曼聯奪標。 曼聯係目前全球最受歡迎球會，今季演出亦比車路士穩定，既然決賽並冇受到停賽或傷兵問題困擾，無可避免會被睇高半線，不過今仗卻機緣巧合安排於車路士老細阿布拉莫域祖家舉行，藍軍等同有半個主場之利，令原本牌面上稍強曼聯優勢頓失，預計九十分鐘打和機會極高，目前和波賠率僅得2.9倍略欠分頭，Peter建議大家取「1:1」波膽，再補埋「0:0」及「2:2」保本。 今場雙方實力、狀態俱接近，但兩隊領隊背景卻各走極端，費格遜資歷深厚，係目前英超最老資格及經驗最豐富領隊，為紅魔鬼盛世奠定鞏固根基。相反格蘭功力一直備受外界批評，接手車路士後雖不乏佳作，但始終未獲球迷認同，今場到底是為費格遜錦上添花，抑或格蘭可以一吐烏氣，絕對是另一焦點所在。 望球證明察秋毫
Peter作為今仗評述員，近日已積極跑步練氣，養精蓄銳，務求以最佳狀態迎接這場世紀之戰，Peter亦希望來自斯洛伐克球證米歇爾能夠明察秋毫，為今仗作出公正、公平判決，以免因一時誤判而影響整場比賽精彩程度。 | 
