| 假如有隊波輸到甩轆，仲要陣容嚴重不整，你會唔會捧？德島漩渦今晚日乙主場迎戰大阪櫻花，我就唔會刻意敲冷，寧願買1.67倍客勝好過，因為漩渦有三件主力因為受傷、停賽唔踢得，未係時候爆冷，對家櫻花前線晒火，對上四次對賽仲要贏晒，點都值得睇高一線！（開賽時間：周三晚6:00）
暫時日乙排尾二漩渦，近九場聯賽得一勝一和七負，擺到明唔夠班，高層為挽回頹勢，決定官網作出大號召，呼籲球迷入場支持球隊，理由係佢○五年以來，主場入場人數已經累積到二十八萬九千八百七十一人，距離「三十萬人達成」目標唔遠，諗住出感情牌打動擁躉。 漩渦三主力齊缺陣 但實情係，漩渦主場入座率低得可憐，少則一千幾百，多則三四千人，即使點熱鬧都嚇唔窒對手，最唔好彩係，佢有兩件中場重心玉乃淳、大島康明接連受傷，搞到連反抗能力都冇埋，因為佢兩位今季聯賽分別有兩個同三個入球，屬於陣中食胡人物，加埋後防藤田泰成停賽肯定有麻煩。
雖然櫻花日前主場不敵水戶蜀葵，聯賽七連勝宣布斷纜，但佢近期「火力全開」，雙箭頭小松墨、卡拉卡今季已合力攻入十一個聯賽入球，腳風簡直順到勒唔住，何況櫻花目標係重返J1，難得近四次對賽全勝，當中仲要狂入十球，試問又點會放過搶三分？即使中場香川真司被日本國家隊召走都唔怕，照捧1.67倍客W！ | 
