| 相對於四年前歐國盃屈居亞軍葡萄牙，依家呢支葡軍仲勁，佔盡上風砌低土耳其，睇見球員放棄個人英雄主義，將天賦融合到球隊中，家陣諗住係整體而唔係個體，年輕球員明顯心理成熟晒，尤其係C朗心理質素幾好，以前一踢大賽就沉晒，依家八面玲瓏，領隊史高拉利應記一功，佢識得玩心理徹底發掘C朗潛質，對土耳其踢三個唔同位置，凸顯C朗配合意識有好大進步。預期C朗可以進一步發揮佢潛能，令到捷克後好頭痛。
葡萄牙知道爭取首名出線重要性，等B組德國走線避佢，好過自己陷入最後一場分組賽對瑞士先決定大局尷尬情況！ 瑞士鋒力弱難破土耳其 運氣係比賽一部分，幸運之神仲會唔會再次眷顧捷克？呢支東歐二線隊冇昔日老將支撐大局後，淨靠銅牆鐵壁防線頂住，但對住瑞士都倒瀉籮蟹，葡萄牙攻力勁過瑞士好多，缺乏創意捷克難以招架。
至於尾場瑞士對土耳其，兩隊波無路可退。瑞士前鋒兼隊長費爾打柴，對東道主等如一場災難打擊好大，令到本來疲乏鋒力更薄弱，想用強勢撕破土耳其防線談何容易，仲要小心土耳其快速反擊得逞。 | 
