| 好波不妨一睇再睇！今晚利物浦主場同阿仙奴八日內第三度交手，歐聯八強次回合決生死。雙方之前兩度交手均打成一比一，熟晒對方踢法之餘，亦證明大家實力不相伯仲，弊在紅軍連續兩場輸死球，防守存在隱憂，開下盤唔離「浦」！（now670及672台、廣東體育周三凌晨2:45直播） 首回合利物浦作客逼和阿仙奴一比一，今晚重返主場就算○比○亦可出線，相反阿仙奴焗攻，紅軍勝算無疑較大。不過朱楓就唔係咁睇，首先，兩隊之前四日內兩度交手，基本上對敵方戰術已相當熟絡；第二，阿仙奴今季聯賽首循環作客亦逼和紅軍一比一，證明雙方實力非常接近；加上歐聯去到淘汰賽階段，主客優勢唔明顯，上屆八強兩場波車路士首回合主場和華倫一比一，次回合作客贏華倫二比一，以及首回合AC主場和拜仁二比二，次回合作客贏拜仁二比○，都顯示出淘汰賽勝負，關鍵在於球員臨場發揮。
 尹佩斯復出增進攻瓣數
 但講到底，利物浦之前兩和阿仙奴一比一，失兩球全部自死球，先至係朱楓睇淡紅軍主因，歐聯首回合艾迪巴約無人看管接應角球頂入，上場聯賽賓特拿接應法比加斯罰球頂入，都顯示出紅軍防守死球方面有問題。 由於阿仙奴聯賽被利物浦逼和，爭標形勢愈見渺茫，有理由相信雲格今晚或會孤注一擲博歐聯。兵工廠今場或有尹佩斯復出，增加進攻瓣數，要取得士哥唔難，隨時第三次重現一比一戰果亦唔奇。 歐聯賽制
今輪為8強次回合，以主客制兩回合分勝負，若兩回合總比數打和，先計算作客入球優惠；再和，則在次回合90分鐘後加時比賽；加時踢30分鐘，再和則互射十二碼分勝負。
| 
