| 今晚歐聯八強次回合生死戰，利物浦主場對阿仙奴上演「雙紅會Ⅲ」，車路士則主場迎戰費倫巴治。兩支倫敦球隊首回合雙雙失利，阿仙奴今仗作客晏菲路焗攻，至少入到一球先有價講，而車路士則非勝不可，同樣形勢險峻，但兩位東方名家巨高及波童依然對佢充滿信心，分別推介阿仙奴下盤及車路士「讓球主勝」。
 利物浦孤寒波累事
 利物浦主場對阿仙奴上演「雙紅會」第三回，雙方對上兩場都打成一比一，證明實力相當接近，今次阿仙奴作客受讓，投注方面佔有一定優勢，況且阿仙奴作客踢盃賽特別醒神，今次去到晏菲路球場唔覺蝕底，受讓平半下盤值得捧場。（now 670周三凌晨2時45分直播） 阿仙奴作客表現一向唔差，印象最深刻必定係十六強次回合去聖西路球場鬥AC米蘭，憑嚴密防守及有效反擊，成功淘汰冕冠軍，可見其威力。 阿仙奴焗攻冇有怕
兵工廠首回合失作客入球，今場一定要爭取入波，形勢上唔能夠太主守，但巨高就唔擔心呢個形勢會影響阿仙奴爭勝機會。翻查往績，兩強相遇場合，首回合失利一方於次回合唔一定受到焗攻影響發揮，去屆八強就有AC及車路士於差不多情況下，次回合絕地反擊成功，分別淘汰拜仁慕尼黑及華倫西亞，呢個數據絕對值得參考。 另外，利物浦亦唔係一隊於優勢下有上佳發揮球隊，講緊係佢於首回合作客得利下，次回合返主場多數冇料到。去屆十六強首回合紅軍作客巴塞隆拿贏波，次回合主場死守爛守下輸○比一，僅僅夠出線。再數遠，○四年歐聯第三圈外圍賽，紅軍首回合作客奧地利格拉茨AK贏二比○，次回合主場竟輸○比一；翌年又係歐聯第三圈外圍賽，先作客贏索菲亞中央陸軍，次回合主場又係輸波。可見利物浦孤寒成性，出線唔益人，大家咪一廂情願以為佢會把握阿仙奴焗攻機會打反擊贏波。 另外往績方面，阿仙奴上季就曾經兩次盃賽作客大勝利物浦，雖然只係兩個盃仔，利物浦出陣容亦擺明唔多想要，但呢個賽績唔多唔少會加強阿仙奴球員信心，受讓始終睇好。 | 
