| 巴塞隆拿近排西甲頻頻失威，要求練列卡特同會長拉波塔下台聲音不絕於耳，今晚歐聯八強次回合，正正係呢支加泰隆尼亞球會一吐烏氣良機！事關史浩克04鋒線死火，賽前又爆出將帥不和消息，今屆歐聯主場贏晒巴塞，誓必狠狠地搵史浩克祭旗，「讓球主勝」捧得過！（now671台周四凌晨2:45直播） 早排西班牙盃出局，聯賽又被皇馬拋離，歐聯似乎係巴塞終極目標。佢聯賽再度失威，同基達菲互交白卷，不過該仗巴塞佔晒上風，更三次攻門中柱，唔到三分真係谷埋一肚火。 史浩克傳將帥不和
雖然美斯、迪高同細哨三大進攻球員仲養緊傷，但由保贊、伊度奧同亨利組成三箭頭，近六仗就包辦十球，鋒力仍具侵略性，加上耶耶托尼、米列圖同伊度奧三位主力周日都踢唔足全場，練列卡特擺明車馬留力今場關鍵之戰。 首回合落後一球史浩克，預期今仗就算作客，都會向巴塞發動狂攻，務求平反敗局，可惜鋒力嚴重不足，今季九場歐聯入得六球，想絕地反擊都係有心無力。賽前練史隆卡向古蘭爾派定心丸，講到明會畀呢位近九仗只入一球射手擔正，惹另一前鋒蘇連拿臣不滿，日前呢位丹麥國腳竟然向德國傳媒「狂插」史隆卡偏心，話就算自己踢到識飛都唔會獲得重用。前線死火加上將帥不和，去到魯營對住怒氣沖沖巴塞仲要焗攻，史浩克盞送死！ | 
