| 德甲今晚有場獨腳戲羅斯托克主場對禾夫斯堡，客隊近況本來唔差，但衰在復活節假爆出主將馬些連奴夜店動粗事件，練馬加夫公開護短影響軍心。加埋「狼堡」聯賽冇乜好爭，鬥志未必及得上等住搶分護級主隊，平手盤安高捧羅斯托克。（有線62周六凌晨3:30直播） 如果齋睇排名同近況，相信唔少人都會揀「狼堡」，事關佢依家聯賽榜排第八，高過羅斯托克六位，自從○八年開始八場聯賽到五勝兩和一負，贏過史浩克04同雲達不來梅，又踢和過漢堡，咁賽績對住○八年聯賽八戰得一勝羅斯托克，贏波有幾難，何況係平手盤？認真吸引。
 羅斯托克未上岸鬥志高
不過，安高再搵多陣資料，就發現「狼堡」今仗其實有多少隱憂。首先，佢月中先德國盃出局，士氣或受影響。其次，佢聯賽排第八，距離到歐協盃入場券第五位球隊史浩克04有七分之多，你估真係咁易追得上？球員鬥志都未必十足。 最重要係，主力馬些連奴畀人發現捲入一宗傷人案，話佢復活節假期最後一日夜店傷人，仲隨時惹官非添！事後「狼堡」練馬加夫雖然話對馬些連奴罰錢，但就強調呢位巴西球星從來都唔係鍾意搞事人喎。做錯事都唔認錯，咁做法對球隊紀律肯定有影響。 另邊廂主隊，雖然近期冇乜幾何贏波，但近四仗都有三仗開和保不敗。依家佢德甲排緊十四，只係高過護級安全線四分，再唔搶分隨時要降班，有鬥志加地利，都係時候反彈！ | 
