| 呢排唔知做乜係咁病，仲要醫足成個禮拜都未好番，都咪話唔得人驚。不過凡事都有兩面，既然病徵「疑似」流感，所以小弟都無謂累人累己傳染畀同事，把心一橫用晒大假，咪當抖養病囉！ 正所謂「塞翁失馬」、「小病是福」，趁呢幾日假期，一次過將積存足球雜誌同未睇波一次過清晒，種充實感確係前所未有。尤其係星期日，晏晝喪刨《稻中》漫畫，到夜晚九點半先睇曼聯對利物浦，之後直落倫敦打，間中仲轉台睇巴塞，到兩點仲睇埋皇家馬德里大戰華倫西亞，完全唔覺得自己係病緊。 其實依家直播波咁多，日日都有得睇之餘，一去到星期六、日根本就睇都睇唔切，小弟晚可以一次過睇晒咁多場精彩賽事，算係咁喇！最重要，仲係因為冇精神刨波，加上呢排手風唔順，推十個盤起碼輸九個，所以上星期日波小弟一場都冇買到，完全係由旁觀者角度咁去欣賞球賽，除本地波之外，呢季真係好似未試過！ 旁觀者清睇死阿仙奴
可能係旁觀者清啦，有幾場波一未發生都好似預知道咁，例如阿仙奴領先一球時候，小弟就覺得班後生仔遲早會捱唔住；去到皇馬對華倫，又突然望到皇馬條防線漏洞，如果有玩「滾球」（即場投注）話，分分鐘出多次雙糧！不過到前晚國際賽可能因為病愈關係，預感突然失靈，冇計啦，有時就係咁，唔係你始終都唔係你！ | 
