| 日職近期踢得好密，聽日打完之後，下周二又開快車，部分細球會少人調動，呢點真係好蝕底。周末大分三神主場迎戰新潟天鵝，三神慘受傷停問題困擾，隊中傷兵滿營之餘，仲有三個球員停賽，兵源買少見少。天鵝已經保持六場不敗，近況理想，今場受讓平半有計！（周六中午12時開賽） 新潟天鵝王牌射手艾美臣今季轉投浦和紅鑽，大軍季初仲未適應，開季頭六場賽事一和五負，衰到貼地！新巴西箭頭阿歷辛度紐尼斯已取代艾美臣位置，但今場呢位射手要停賽，本來對球隊鋒力有影響，好彩佢同鄉馬斯奧李察士上仗已復出，大軍進攻火力得以維持。 兩軍今季兩度於日聯盃交手，天鵝雖錄得一和一負，但當時球隊正處低潮難作準。佢近期保持六場不敗氣勢盛，受讓平半捧得過。
 三神天殘地缺
大分三神上場作客FC東京○比一輸波，全失三分之餘，仲有兩個球員領紅被逐，包括守將森重真人及射手前田俊介；此外，中場外援羅拔圖亦夠牌，今場三位仁兄全部都要坐波監。而「日本美斯」家長昭博及射手高橋大輔仲長抖緊，箭頭高松大樹亦上陣成疑，雖然老將烏士利有望復出攻堅，但球隊傷停球員太多，戰鬥力已大幅削弱。 同日有場靜岡打戰，清水心跳主場迎戰磐田山葉，兩軍同樣連贏兩場，大家狀態不俗，但心跳上季兩戰山葉贏晒，明顯剋住對手，今周主場出擊有望再下一城。 | 
