| 連續兩晚歐聯大戰之後，歐協盃決賽分子亦會今晚誕生，打頭陣辛尼特會返主場恭候拜仁慕尼黑。咪以為呢支俄羅斯班霸首回合偷到雞，住個作客入球就有運行，事關佢今晚有三大主將缺陣，撞正拜仁有「入球王」東尼刑滿復出，今戰強陣出征聖彼得堡，誓要殺辛尼特一個片甲不留，客軍小讓平半，捧「上盤」！（有線61及64、廣東體育周五凌晨0:30直播） 首回合拜仁佔盡優勢，無奈盧斯奧烏龍波搞到熱W倒灶，雙方最終各一言和。照計辛尼特返到主場，理應有力同拜仁一拚，弊在呢支去季俄超盟主狀態麻麻，新季聯賽六戰只得一勝四和一負，緊仲要大戰莫斯科中央陸軍，睇怕佢都幾頭痕。就當練艾禾卡特將本土賽事暫時拋諸腦後，但後歷臣、中場拉迪克施爾、主力射手艾沙維今仗齊齊坐波監，個陣天殘地缺，根本冇本錢同拜仁鍊過！
 辛尼特 3虎缺陣
 同三虎缺陣辛尼特相反，拜仁依家順風順水，聯賽拋甩次席不來梅十二分，剩番四場波多一分就可以封王，加埋上月中捧走德國盃，佢依家可以集中全副精力，擺落去歐協盃，向「三冠王」榮譽進發。最難得係，拜仁上場聯賽大勝史特加後，總經理漢尼斯問班球員想點慶祝，一眾戰將竟然耍手擰頭，話要贏埋歐協盃先開Party喎，就憑呢種戰意，拜仁今晚肯定唔敢再輕敵。 拜仁養精蓄銳 搏今鋪
講到最令人放心捧拜仁，都係今季轟入三十六球東尼刑滿復出，有佢呢位射手衝鋒，加上練希斯菲特又周日聯賽收起拿姆、簡尼同盧斯奧，而列貝利、高路斯同雲邦美亦踢唔足全場，養精蓄銳搏呢場關鍵之戰，睇怕辛尼特都係凶多吉少！ | 
