| 用「捉到鹿唔識脫角」形容費倫天拿最適合不過，呢支意甲球隊歐協盃八強維持唔到領先優勢，首回合慘被燕豪芬逼和一比一，今晚去到燕豪芬地頭想出線就要焗攻，只可惜佢作客表現素來唔多可靠，緊又要聯賽大戰國際米蘭，分身乏術隨時搞到兩頭唔到岸，燕豪芬小讓平半值得捧場！（有線61周五凌晨2:45直播） 貴為意甲實力分子，「紫百合」有幾多料唔使度多講，但近期表現就較為飄忽，作客演出更跌晒Watt，最近聯賽就接連輸畀錫耶納、拿玻里同烏甸尼斯。睇番歐協盃戰績，原來費倫由第三圈到依家，五場作客賽事只係贏得一場咁大把，今晚遠征荷蘭難寄厚望。 主場專剋意甲球隊
主隊燕豪芬今晚雖有秘魯射手法芬停賽，不過呢支荷甲「一哥」勝在入球點分布廣，高化文斯、拿索域、巴卡爾甚至西蒙斯今季都屢有建樹，真係唔愁冇人入波。球隊過往歐洲賽對住意甲隊伍都佔上風，八次主場出擊取得六勝二負佳績，心理上當然佔優啦！ 況且燕豪芬荷甲領先次席阿積士五分，下仗只要贏波就即刻封王，冕機會高唱入雲，依家梗係可以疊埋心水歐協盃爭取佳績啦！相反費倫依家晉級形勢並唔樂觀，意甲方面又要保住前四確保來屆歐聯參賽資格，周日亦要造訪國米，今晚會唔會去盡都係一個問題。 | 
