| 足協盃八強次回合，西甲「超級黑馬」基達菲主場迎戰德甲班霸拜仁，基達菲足協盃八強首回合作客逼和拜仁一比一，今晚返主場出擊當然受到重視，不過黑柴認為佢近期跌Watt兼陣容不整，難擋級數高一班拜仁來犯，拜仁強陣作客小讓平半，賽前賠率走勢凌厲，上盤值得支持。（有線63台周五凌晨2時45分直播）
 主隊近仗勝在有運
 基達菲今季限米煮限飯之下能夠屢創佳績，永不言棄作戰精神係成功關鍵，不過細心睇近期表現，黑柴覺得佢已經勁跌Watt，近四場賽事只入一球，聯賽先輸畀畢爾包同奧沙辛拿，作客安聯球場之役，拜仁領先一球之後受惡劣天氣及場地濕滑所限，東尼、列貝利及普多斯基門前多番失機，直至完場前畀基達菲僥倖扳平；至於作客魯營和到巴塞，更加好似中六合彩，全場畀人住踢，但係巴塞三度射中柱，加上門將艾邦丹薛里不下三次救出必入波，呢兩場波基達菲都應該大敗，唔輸真係大話夾好彩。 拜仁目標「三冠王」
今晚基達菲主場出擊，但係因為輪換制，大勇艾邦丹薛里會讓位畀烏斯達利把關，佢上仗和巴塞付出沉重代價，中場柏保路靴南迪斯同後馬里奧未到半場已經傷出，今晚上陣成疑，加上中場大將格尼路停賽，球隊本身後備兵源有限，經過大半季拚搏，球員體能狀態亦明顯下滑，殘陣迎戰拜仁未許樂觀。 拜仁聯賽踢少個反勝波琴三比一，信心返晒，贏波後聯賽冠軍已成囊中物，可以集中精神向「三冠王」目標進發，練希斯菲特決定重新起用高路斯，今晚打醒精神強陣出擊，贏波晉級機會甚濃。 | 
