| 流浪老帥禾達史密夫踢歐洲賽戰術非常保守，球隊首回合主場出擊，仍然缺乏進攻意欲，防線經常求其一腳解圍，令到中前場完全組織唔到攻勢，結果求仁得仁窿窿完場，當冇踢過。今次作客面對士砵亭，流浪作戰策略一字咁淺，有波就清，總之將皮球送離危險地帶，務求順風順水捱到加時鬥爬。 兩隊守強攻弱
早前傳出流浪守將古拿受病毒感染，隨時有機會缺陣，不過，賽前古拿順利通過體測，將會隨隊出征。中堅華亞雖然轉身唔夠快，而且跑得好慢，不過，呢位老將勝在經驗豐富，中路包抄功夫上乘，今次對住士砵亭，大可當正對手係巴塞隆拿咁死都唔出，呢招九○一夠悶夠煩，唔係個個頂得順。 睇番流浪降格踢足協盃後，五場賽事全數開出細盤，得、失球數字偏低，足見呢班波防守一流，進攻九流。士砵亭情況亦唔好得幾多，首回合攻勢多屬隔靴搔癢，真正威脅冇乜，既然兩隊都乏攻力，一於玩細盤啦！ | 
