| 英超去到最後一輪，部分球隊戰意鮮明，於煞科日要贏先達到目標，唔係就失去冠軍或者護級失敗，就係呢個必勝決心已經足以信任。車路士、曼聯分鬥保頓同韋根，贏波穩如泰山；而雷丁同富咸亦大有機會打敗打比郡同樸茨茅夫。 曼聯車仔冇得拗頸
要贏賽事，到最後唔係一定會贏到，但睇番呢四場波，幾支有決心球隊，勝出機會的確好大。曼聯對住韋根，後者主帥布魯士係費格遜徒弟，去到關鍵場合，點會唔報恩？車仔主場鬥基本已上岸保頓，亦肯定可以勝出。打比郡係魚腩極品，已經晨早降班，呢次就算有主場之利，亦頂唔住如狼似虎雷丁。相對地富咸作客樸茨茅夫已經較有變數，但後者目前心繫足總盃決賽，已經無心戀戰，富咸近期頻頻發威，力足取得勝仗。呢條四串一乘埋分頭唔錯，大家可以考慮。 ＮＢＡ方面，目前已去到東西岸準決賽階段，湖人剛不敵爵士，場數被追成一比二，換句話講季後賽中已再無不敗之師，預計未來賽事將會愈打愈激，戰情將更加精彩。湖人主將高比拜仁演出不俗，個人表演好睇到極，但講防守，球隊就並非頂級。無論足球或籃球賽事，要總冠軍就要打好防守，呢個係必要條件，球隊進攻打得幾悅目，但做唔到攻守平衡，最後都難以取得好成績。湖人鬥爵士，第四仗戰果將會好關鍵，因為三比一同二比二，可謂有天淵之別。 | 
