| 正所謂護級大過天，今晚德甲獨腳戲「雙堡」大戰紐倫堡主場對禾夫斯堡，上盤咪走「堡」！事關紐倫堡近期積極搶分護級惡過鬼，靈魂人物米斯莫域仲連續四場有波入；相反「狼堡」前鋒加菲迪繼續坐波監，後防大將麥龍又上陣成疑，攻不銳守不穩，隨時連破蛋都破唔到！（有線61周六凌晨2:30直播）
 德甲仲有七周就煞科，上半季沉淪護級位置紐倫堡，近排終於復甦，先主場打和榜首拜仁慕尼黑，上場作客更反勝法蘭克福三比一，取得○八年首勝，今晚贏埋禾夫斯堡就可趕過比勒費爾德同科特布斯，暫時脫離降班漩渦，你話唔贏等幾時？ 禾夫作客交手冇運行
紐倫堡近排回勇，朱楓認為主要因為佢隊中進攻主力相繼復出兼回復狀態，令練雲希臣大把人腳踢進攻足球，之前兩仗對拜仁同法蘭克福，都排出近乎四二三一至四三三陣式，維迪、查列斯迪斯、沙安高、真高拿同文度五名國腳前鋒輪住踢，中場仲要擺多個米斯莫域，呢位波斯尼亞隊長近排弗到漏，連續四場入波，今晚對禾夫斯堡，紐倫堡更有中場安祖赫特及後安達斯禾夫刑滿復出，三線非常齊腳。 禾夫斯堡歇冬後聯賽獲得七勝兩和一負，不過首席射手加菲迪因為之前對漢堡同馬菲臣開拖被停賽五場，今場繼續坐波監，火力始終差咁，最慘後防大將麥龍上場對漢諾威踢二十分鐘就退下火線，今仗未知能否趕及上陣，加上「狼堡」近六次作客紐倫堡未嘗一勝僅錄三和三負，今鋪受讓平半都咪亂試！
 | 
