| 正所謂冤家路窄，歐聯四強大戰首回合今晚晏菲路球場爆發，戲碼又係利物浦對車路士！兩隊近六次歐聯對賽夾埋入得三球，全部開入球細，既然利物浦有隊長謝拉特好番，唔能夠全力搏殺，車路士又有中場艾辛停賽，減低攻守效率，入球細要得過！（now670及672台、廣東體育周三凌晨2:45直播） 首先化身數據王講歷史，過去四年兩隊歐聯六度碰頭，結果六場波全部開入球細，總共得三個入球出現，梗係啦，關乎歐聯決賽入場券喎，當然唔敢立亂谷上前同對方駁火，加上紅軍、車仔都係守強過攻，球員又熟晒對方路數，約埋踢守勢足球都好正常。
 為個女賣世盃冠軍球衣
雖然一九六六年英格蘭奪得世盃冠軍陣，雲雲仲未出世，但除知道呢支國家隊當年非常威水之外，亦有聽過捧盃功臣之一伊斯咸大名。呢位中場球員六、七十年代踢史篤城風光一時，仲曾經決賽一腳射死車路士，協助球隊捧走聯賽盃。不過唔識未雨綢繆就點風光都冇用，現年七十一歲伊斯咸不惜出售六六年世盃冠軍球衣，希望籌得五萬鎊幫個女交學費。 雖然以前職業球員人工冇依家咁高，但話晒都係名噪一時國家隊英雄，後生時唔好好為晚年鋪路，臨老憂柴憂米又怪得邊個？剎那光輝唔代表永，除唔好有風駛盡巾里之外，做人亦應該積穀防饑。
 謝拉特頂硬上有顧忌
除此之外，兩隊近七次對賽都係開晒細，未試過有例外，消息又話之前整親條頸利物浦隊長謝拉特已經好得七七八八，可能會紮住上，不過就住就住都未必有好發揮啦！依照領隊賓尼迪斯作風，睇怕都係先求穩守格局，如果唔係，唔覺意畀車仔攻入作客入球咪大煲？ 車仔壞埋中場發電機
車路士更多麻煩，早前要照顧患病母親林柏特雖有望復出，但艾辛坐波監肯定缺陣，呢位中場近期狀態大勇，馬基列尼已過晒高峰期，根本取代唔到佢位置，對上兩場車仔對愛華頓、韋根只係分別攻入一球，兩球都係艾辛射入，證明副偈未撻，與其估邊隊贏，我寧願玩入球細！ 玄數 利物浦鍊「車」贏多輸少 ‧過去73次主場對車仔，取得48勝15和10負。 ‧自1965年後，從未試過在歐聯4強被淘汰。 車仔半場守得住 ‧近6次歐聯對利物浦，僅得1勝3和2負。 ‧對上15場有14次半場保持清白，當中有11次領先。 | 
