| 今晚足協盃四強首回合賽事，格拉斯哥流浪主場迎戰費倫天拿。樂比仔向來對蘇格蘭球隊主場相當有信心，何況今仗仲係平手盤，不過流浪近期卻面臨今季最大危機，魔鬼賽程令球員疲態畢露，今仗更有八大主力唔出得，「紫百合」費倫天拿可乘虛而入。（有線足球台61周五凌晨２時45分直播） 樂比仔一向好欣賞蘇格蘭球隊鬥心，蘇格蘭國家隊主場可贏到法國，兩大班霸些路迪同流浪歐洲賽主場亦屢有佳作，話之你係世界級強隊，總之心口掛住個勇字，往往發揮超水準，呢種永不言敗精神，實在令人佩服。 不過，水能載舟亦能覆舟，流浪就係被呢種不死精神所累，唔懂得留放之道，球隊為一嘗四料冠軍心願，連聯賽盃同足總盃都唔放過，雖然早前勇奪聯賽盃先聲奪人，但足總盃四強對住甲組仔聖莊士東僅互射十二碼晉級，加上近期聯賽接連失分，失去榜首位置，狀態相當低沉。 八大主力唔出得
事實上，流浪戰線過多，近幾仗已付出代價，上仗對聖莊士東，賴史密夫及基斯布基均於上半場勇戰受傷，加上上仗踢足百二分鐘兼互射十二碼，對近期踢得咁密流浪講，簡直係百上加斤，球隊今仗共有八名球員缺陣，除賴史密夫及基斯布基外，麥高洛治、比士利、查理阿當及正選門將麥基哥均倦勤，加上巴利費格遜及奇雲湯臣停賽，個個都係主力，主帥禾達史密夫都幾頭痕。 費倫箭頭射到順晒
雖然費倫天拿亦係一支典型主場球隊，但今屆足協盃作客亦贏過燕豪芬同洛辛堡，射手梅度同柏仙尼均大勇，計實力點都好過流浪，相信費倫可趁佢病佢命。 | 
