| ESPN獨家直播歐聯四強首回合激戰，巴塞隆拿魯營球場同曼聯玩心理戰，即使佢主攻，但對住氣勢超勁曼聯，想贏又談何容易？紅魔鬼作客只要做好防守本分，實行快速反擊戰術，可以保不敗為躋身決賽鋪路。 8場聯賽7場不勝
因為心理包袱冇咁大，其實準決賽多數都好睇過決賽，呢場波好可能會係今屆歐聯最精彩比賽。紅魔鬼下半季「魔性」大發，連續歐聯同英超踢出懾人氣勢，球員一定要有超乎常人贏波決心，先至能夠踢得出咁水準，上場摸和布力般係少少苦楚等於激勵，費爵爺仲用埋苦肉計，專登放風話如果今季唔能夠成為雙料冠軍，佢就要告老還鄉！曼聯將士聽到後肯定晒火，要為佢老人家搏命！巴塞呢個時間要做攔路虎睇怕都好難啦！ 相反，巴塞西甲同城打只能悶和愛斯賓奴，大家千祈唔好以為佢留力，事關巴塞近八場西甲聯賽已經有七場贏唔到波，自從細哨同球會唔妥之後，成隊波氣氛好差，好多大牌球星都側側膊，對賽事勝負根本完全唔上心，聯賽自然被皇馬拋離啦！家陣連練列卡特都話當務之急係要恢復士氣，但係今鋪面對狀態大勇曼聯，邊有咁易谷得起！ | 
