| 作客波唔易踢，不過呢條定律未必適用曼聯身上，事關今晚歐聯四強首回合作客巴塞隆拿「紅魔鬼」，對上一次魯營球場比賽，就係九九年贏得歐聯冠軍，今次重臨福地，仲要咁好彩撞正巴塞隊長佩奧爾停賽，美斯傷愈狀態未足，佢同C朗球王對決可謂未打先輸，大勇曼聯唔難先下一城，平手盤撐硬「紅魔鬼」！（now670台及672台、廣東體育周四凌晨2:45直播） 魯營球場人見人怕，偏偏卻係「紅魔鬼」球員至愛，皆因九九年歐聯決賽，曼聯就係呢度同拜仁激戰，結果到最後階段連入兩球反勝捧盃，締造三冠王傳奇。安高唔敢講話曼聯度可以當主場咁踢，但班球員未至於會怯場，相比起，巴塞近三次主場出戰都只係贏得一場，又會有幾多優勢？
 曼聯重臨福地士氣一流
事實上，講狀態今期真係此消彼長，曼聯英超形勢大好，奪標在望；上仗歐聯八強次回合鬥羅馬，出半力都一樣照贏，超班實力同Top Fit狀態都係冇得彈。至於話巴塞西甲爭標機會經已名存實亡，歐聯上一圈贏史浩克04又係拖泥帶水，畀人攻到氣咳，極予人冇料到之感，今次撞重臨福地曼聯仲有冇咁好彩？安高真係唔多睇好囉。 佩奧爾停賽影響大
再者，今場對巴塞講最致命係隊長佩奧爾停賽，少呢個後防重心，士氣減低之餘，防守力更加大幅削弱，要守住「紅魔鬼」朗尼同泰維斯狂攻已經夠難，加埋今期弗到爆C朗拿度，輸少粒都偷笑啦！冇錯，巴塞有美斯同亨利傷愈復出，但佢狀態始終令人懷疑，依家巴塞仲要冇埋細哨傳送，得一個伊度奧健健康康數胡，就想攻破曼聯條後防線，難！今鋪次世代球王對決，一於撐C朗，捧曼聯！ | 
