| 今周最後一場西甲快車，由愛斯賓奴主場迎戰馬德里體育會。馬體會要保住來季歐聯參賽席位，但奈何作客表現一般，今季得勝率僅得三成半，要讓波實在唔划算。雖然愛斯賓奴仍未破解不勝魔咒，但已連續三場不敗，加上本身班底唔曳，主場受讓平半絕對博得過。（有線足球台61周五凌晨3時直播） 其實現時兩軍目標差唔多，餘下三場都係為來季參戰歐洲賽努力，馬體會當然望保前四，而愛斯賓奴要爭第六亦有一絲希望，所以今場絕非風流波。毫無疑問，愛斯賓奴絕對係下半季西甲令人最失望球隊，自一月被艾美利亞打破十四場聯賽不敗紀錄後，往後十七場聯賽僅得三勝，令人大跌眼鏡。同時亦將上半季優勢輸清，搞到如今連歐洲賽資格都危危乎。
 愛斯賓奴三連和有起色
 不過，近期愛斯賓奴的確有好轉，經過四連敗之後，近三場比賽都能保持不敗，當中包括摸和巴塞隆拿及薩拉戈薩，而上場亦憑加西亞費南迪斯完場前逼和利雲特，相信士氣唔會太差。再者，今場揀波關鍵係愛軍主場受讓，主隊今季十七次主場獲八勝三和，不敗率有六成五，絕對唔失禮；相反馬體會作客就認真唔見得人，今季十七戰僅得六勝，以其三成半得勝率，又點有能力讓波呢？ 除此之外，論實力計，嘉輝認為愛、馬兩軍都只係半斤八，整體上隨時愛斯賓奴更好。而兩軍近六次對賽中，愛斯賓奴獲得三勝三和未嘗一敗，根本睇唔出兩者「friend底」，主隊會讓路等陰謀論，愛斯賓奴今場又擁主場之利，受讓認真抵捧。 | 
