| 正所謂否極泰來，衰到貼地墨西哥球隊CF阿美利加，早排換練隨即反彈，整個兩連勝出！聽朝佢自由盃八強首回合返番位處海拔二千二百米阿斯達卡主場出戰，憑住高原優勢，加上高昂士氣，當然讓得起表現反覆巴西勁旅山度士平半，安高捧上盤。（開賽時間：周五早上8:20）
 話阿美利加衰到貼地絕對唔係講笑，呢支墨西哥老牌勁旅財雄勢大，多年都係國家入面一級勁旅，偏偏今季衰到國內聯賽包尾，你話幾咁令人失望。到自由盃，分組賽出線都係僅靠得球較多晉級，到十六強首回合主場再輸二比四畀巴西法林明高，佢個阿根廷練奧馬羅曼奴先至知衰，毅然辭職，之後球隊搵看守練桑恩儂拿接手，果然就即時反彈，先係墨超贏波，繼而自由盃作客贏番法林明高三粒，震驚整個南美洲球壇。 山度士準備差作客曳
事實上，阿美利加實力唔曳，只係球員自信心真係麻麻，陣中有巴拉圭射手卡賓拿斯飛，今屆自由盃已經入六球，有把炮！再者，佢之前分組賽主場已經三戰全勝，連阿根廷班霸河床到都要輸三比四，今晚又點會驚山度士先？ 另邊廂山度士，對於作客高原似乎有所顧忌，大軍係分兩批抵，其中練李奧帶同包括前鋒利馬同韋斯利等七名球員係周二先到達匯合大軍，步伐唔一致，安高好懷疑佢個士氣同準備工夫喎。仲有，咪睇佢近五場贏三場好似狀態唔差，實質贏親都係隊哥倫比亞古古達，反而先後作客輸畀法林明高同墨西哥瓜達拉哈拉，今鋪又係作客波，安高就唔多信佢！
 | 
