油價不斷升高，莫講話職業司機齊聲叫苦，就連私家車車主都牙痛咁聲。依家香港每公升電油賣十五個半左右，睇個勢遲早要賣成廿蚊一公升。電油咁貴，唔用得唔得呀？得，巴西人就瘋狂種蔗，佢唔係鍾意咬蔗，係用提煉乙醇。中國仲犀利，將動物臭臭儲地下糞池，等分解出甲烷然後做燃料。但講到尾，石油仍然係主打能源，大家惟有忍耐，捱多陣貴油！
拖連奴立立亂 想話餵飽部車，睇要中番場波先至得。今晚意甲十場波，其中羅馬主場對拖連奴，巨高對主W極之樂觀。現時羅馬同榜首國際米蘭有六分差距，今場唔贏就隨時畀國米提早封王，形勢迫使羅馬唔能夠鬆懈，今場必拚。而對手拖連奴近三場全敗兼冇波入，狀態差得緊要，隊長哥莫圖更帶頭搞兵變，球隊士氣受打擊，今場作客聽捱打。（now 635周日晚9時直播）
