| 英超冠軍決戰今晚爆發！曼聯作客車路士前只領先三分，最後三場聯賽仲有得爭，不過曼聯得失球有絕對優勢，就算輸波仍然Head住車仔，呢點就變「紅魔鬼」絆腳石，決心唔及許勝不許和主隊。車仔有「不敗鐵三角」施治、卡維奴同艾辛壓陣，加上史丹福橋四年幾英超主場不敗，車仔讓平半都要捧！（now632台周六晚7:45直播）
 曼聯Head住3分戰意輸蝕
追追，曼聯依家只係領先車路士三分，不過球隊得失球有極大優勢，如果今場作客搞掂車路士，基本上已經99%封王，就算和波甚至輸波，只要最後兩仗贏晒亦係十拿九穩。不過，係咪真係咁理想先？我踢咁多年波，知道做球員最忌就係有「輸波都掂」諗法，雖則話想即刻捧盃，但落場球員難免踢得穩陣唔敢去盡，唔想輸心態將大大影響曼聯爭勝機會。 施治+卡維奴+艾辛 =未輸過
冇錯，曼聯朗尼C朗「2R」組合的確好強，不過車路士亦有一個刀槍不入後場「不敗組合」，周中歐聯打到上身施治、近期狀態大勇中堅卡維奴，同埋歐聯坐完波監復出艾辛，呢條車仔中樞將可抵抗曼聯進襲。我翻查數據，原來施治、卡維奴同艾辛齊齊踢正選所有賽事，車仔已經超過兩年未輸過！ 講到車仔不敗，當然要提佢史丹福橋偉績啦，車路士英超主場已經連續八十場不敗，就算計晒所有盃賽亦都兩年幾未輸過，曼聯有尼曼查維迪受傷上陣成疑，加上對巴塞捱足全場體力下降，今場未必頂得住車仔進攻。橫計掂計車仔主場都秤高一線，梗係要捧戰意旺盛車路士啦！ | 
