| 今晚兩場英超賽事，Peter比較睇好兩支客隊布力般流浪同阿士東維拉。布力般一向好硬淨，上仗搞到曼聯冇啖好食，幾乎可以贏波，尤其係門將費度表現如有神助，以樸茨茅夫偏弱入波能力，更加難攻破佢十指關，受讓要捧下盤。 愛華頓季尾走下坡
另一場愛華頓主場對阿士東維拉，「拖肥糖」季尾走下坡，近六場聯賽只係贏得一場，對手只係打比郡，表現好難令人信服。反觀維拉當弗，近排經常大炒對手，對下季歐洲足協盃參賽資格志在必得，維拉今場受讓，Peter都係要下盤。 講完足球講籃球，今季ＮＢＡ季後賽原本被認為爭持最激烈對壘，應該係西岸三號種子聖安東尼奧馬刺對六號種子鳳凰城太陽，不過依家出結果係馬刺盤數上已經遙遙領先三比○。歸根究柢，太陽頭兩回合比賽都係領先之下反勝為敗，呢種逆轉式敗陣最傷士氣，結果造成第三回合大敗收場。 鳳凰城太陽今季出奇招，搵奧尼爾用雙塔戰術，但如意算盤明顯打唔響，加埋拿殊年紀亦唔細，證明過氣老將遠遠唔及一冒起新秀。以依家情況睇，太陽今季算係已經完結，只可惜當打史杜迪米亞又浪費一季。 | 
