| 國際米蘭今晚意甲主場對卡利亞里，今仗隨時可定出聯賽冠軍。基於意甲尚餘四輪比賽，而國米領先另一支爭標球隊羅馬有六分，故此今場國米如果主場勝出，而羅馬主場又輸畀拖連奴的話，國米就能提前三輪聯賽封王。冠軍就在眼前，度士相信國米一定全力搶分，「讓球主勝」值得捧場。（now 634周日晚９時直播）
 國際米蘭攻力非凡
意甲若出現兩隊同分，將計對賽成績，國米今季對羅馬有一勝一和優勢，今晚只要再同羅馬拉開三分距離，便可領先至九分，即使將來被追平，亦可憑對賽成績奪冠。 臨近煞科，國米即刻番料，近三場聯賽獲得全勝之餘兼不失一球，幾位進攻球員如史坦高域、告魯斯以及巴洛迪利都狀態良好。上輪聯賽雖然受制於拖連奴嚴密防守，但仍然能夠靠質素撕破對手防線而全取三分。今晚國米不但擁有主場之利，對手卡利亞里作客成績又曳到痹，主客形勢令到雙方差距進一步擴闊，國米大炒卡利亞里並唔出奇。 卡利亞里三主將停賽
人腳方面，國米仍然會缺少伊巴謙莫域；不過近期意國新秀巴洛迪利表現神勇，由此子頂上打正選對攻力並無太大影響。而另外幾名前鋒包括基斯普、告魯斯及蘇亞素都冇傷冇痛，可隨時落場搏殺。國米進攻本錢充足，唔使驚佢冇波入。 卡利亞里一向都係主強客弱，今場去到聖西路球場當然唔睇好。而陣中三位主將如霍治亞、芬尼以及法蘭斯高比辛奴都停賽，單靠艾基費斯卡好難威脅到國米。卡利亞里近四次作客國米都輸晒，睇怕今場都唔會例外。 | 
