| 王者曼聯等待加冕！英超冠軍已成「紅魔鬼」囊中物，今晚曼聯作客布力般流浪，難免有半隻眼瞄住下周中對巴塞隆拿場歐聯大戰，收起主力不足為奇。不過和仔叫得曼聯做「王者」，當然信佢有王者風範，曼聯傷兵相繼復出，今場正係一班「板球星」騷Quali時間，布力般等緊收工點阻曼聯，「讓球客勝」放心捧！（now632台周日凌晨0:15直播） 曼聯上星期反勝阿仙奴後，目前領先車仔兩分，而且仲打少一場，雖然費格遜話獎盃一日未到手都唔可以放鬆，但佢自己、球員同球迷，都心知曼聯已肯定會係最後王者，依家開始將注意力轉移去歐聯係非常合理。曼聯下周中作客魯營球場鬥巴塞，重要性比起今場高得多，預計費Sir將會大刀闊斧，C朗、朗尼等主力將唔會正選陣容。
 副選兵一樣 贏羅馬
 冇「2R」咁點算？和仔就一都唔替佢擔心，事關曼聯季尾開始已經不斷輪換，就好似對羅馬歐聯八強次回合，費Sir一樣大膽收起晒主力，結果球隊照樣贏波，呢仗除證明曼聯所謂副選球員質素極高外，費格遜大膽用兵亦係一絕。加利尼維利、施維斯達已復出，尼曼查維迪亦都復操幾日，今場可以夫添候命，加上拿尼、朴智星同碧基等人近期表現出色，呢班後備已經夠組成一支巨型班啦！ 布力般流浪本身實力都唔差，不過球隊依家已經打緊風流波，近排表現就好似度緊假咁，近六場聯賽只贏得一場，完全唔對路。如果大家信有陰謀論話，布力般領隊曉士係費格遜愛徒，同曼聯亦有深厚感情，既然球隊已經無欲無求，何不做個順水人情呢！ | 
